[color=blue]
يا سيد الخلق مدحك
يبعت في قلبي المسرة
الفرح في القلب يضحك
ويعم كل المجرة
.......................
طول عمرى سابق لجيلي
ولا كلت يا دنيا نبقك
با اتحمل اللي ياجي لي
وآديني ساير في سبقك
.....................................
قالوا الحوايط ليها ودان
فلا تبوح باللي عملته
وآديني عايش بلا لسان
وفي نفسي سري كتمته
.................................
اللي ما ينفع على الضيق
في الوسع ما أظن ينفع
لوحتى ملو الصناديق
الكتر منه ما ينفع
.................................
وندهت قالوا عايز مين
راحوا الأصايل وغابوا
راحوا وع البعد عازمين
بعد الخسايس ما عابوا
.....................................
النخل طارح بلح شيص
والبحر كاره مضيقه
والندل يلعن أبو ابليس
وف سره يبقى رفيقه
..........................................
كان ليا صاحب أرى بيه
ويزيدني في الشدة شدة
دلوقتي إبني أربيه
يرميني في وسط شدة
..................................................
زرت اللي لا ود ليهم
ومنايا أغير ظنوني
لقيت واطيهم عاليهم
ونسيوا مكاني ونسوني
.....................................
عدو أهلك عدو ليك
ومناه يرقب كروبك
لو يام شاهد هلال ليك
يتمنى لحظة غروبك.
.................................................
اللي بيصهل مينهقش
و لا صقر كان كل حايم
سرب الحمايم ما ينفعش
و لو كسود الغمايم
.............................................
كداب من يعجن الصبر
و لا يدوقش مراره
واللي بإيده حفر قبر
لا بد يعرف قراره
.................................................
طبيبي قافل مشافيه
وجروحي نازفه دماها
وين الطريق اللي مشى فيه
وترك لعيني دي ماها ؟
..................................
وتر الربابه علي حن
بلسم كوامن جروحي
لا سلوى عايز ولا من
غير اللي روحه في روحي
.....................................
قيلت في ضل رمشيك
وشربت قهوة عيونك
يا عمر في العمر با مشيك
و لا عمري ينفع بدونك
....................................
يا ساعة بالله هدي
لحظة ما اقابل خليلي
خليني آخد وأدي
ويشفي قليبي العليلي
........................................
لو يوم زماني عدل لي
والبدر عاود ظهوره
لفرح واكيد العدا اللي
قطفوا في قلبي زهوره
...............................
للغاب كم حن أرغول
وبكت قصايد حنينه
واللي ملك قلب لو غول
في الفرقة تسمع أنينه
.......................................
قالوا لي قرب يا صياد
إن كنت ع الصيد ناوي
قربت اصيده ومياد
قده جرح لي الكلاوي
....................................
سافرت بيكي بلا قطار
ورسيت بك فجر ع المين
ومشيت بين رعد وامطار
ولا حد في الخلق عالمين
......................................
مين اللي قلبه ما غناش
لحظة يقابل حبيبه
لولا المحبة ما كناش
مجروح يداوي طبيبه
............................................
ضفيرة هلت مع الشمس
نبع الطفولة رواها
هلت كموجة من الهمس
وحكت لبكوة هواها
............................................
يقرالي دومنيك دوفلبان
واشرح له قيس الملوح
وعلينا ضي الفلق بان
والبدر مسى وروح
............................................
يا بحر موجك علي مال
وحدف حنينه في عبي
و لا غير قليبي لي رسمال
منه الحبايب تعبي
...................................
يا ليل نجومك مراجيح
كم مرجحت في خيالي
والدنيا دكة على الريح
أجلس عليها ليالي
..........................................
أطرق بيبان الحواديت
وأصاحب السندبادي
وادخل مع الزيبق البيت
واخرج معاه للأعادي
...................................
شارد رغيفك يا غلبان
ووراه من الفجر تسعى
والمح في وشك متى بان
شقيان من سن تسعه
...........................................
وايه يعمل اللي بلا جناح
لو للسفر حان دوره ؟
وايه يعمل اللي الحلك راح
يمه وما هلت بدوره
..................................
شبابيك عتيقة على الكون
منها تطول الخلايق
ها اطل طلة عسى يكون
فيها انكشاف الحقايق
....................................
البال بالهم موسوق
والفكر شارد وساهم
ما له حق يدخل السوق
أبو جيب خالي الدراهم
......................................
محارة سودا على القاع
والقلب منها حليبي
خرجت تنادي على شراع
خرجت وفيها قليبي
...................................
داخل قليبي سماوات
أفتح نوافذ ضياها
واعبر مداين وفلوات
عرض المدى منتهاها
..........................................
قهوة في قهوة ورصيفين
وعيون ماليه المطارح
وخريف معدي وصيفين
وربيع مزهزه وطارح
.....................................
لمينا في الندل ما اتلم
وطلع لسانه لبره
يرحم أبوه اللي مات لم
يحكم على ودن جرة
.......................................
عامل عزومة وزحمة
وداعي جيران الجيران
وطبيخ بلا أي لحمة
الله يجازيك يا شيطان !!!
.......................................
يا غاليه ما بين إيديكي
يحلى معايا الوقوف
أقرا دروسي عليكي
واتحدى كل الظروف
......................................
أضحك في وشك متى لاح
وأداري عنك همومي
واعمل صنايعي وفلاح
لاجلك في ليلي ويومي
.....................................
رعيت شياهك في صغري
ووشمت على زندي نيلك
وكبرت أصونك بعمري
وحجبتي عني دليلك
....................................
ع الباب واقف وببكي
وحيطان سورك عوالي
يا غاليه ولامتى بابكي
يفقل في وش الغوالي ؟
......................................
أزرع وشجري رمى طيوب
م الصبح لما عشايا
واصبر كما صبر أيوب
وأبات من غير عشايا
.....................................
طول عمري أشرق واغرب
وازرع ترابك واراعي
وارجع في لحظة ما اقرب
مقهور حتى نخاعي
....................................
ريحك علينا ما هلت
وانا اللي حاضنك بهدبي
الشمس في الصبح طلت
وانتي ما داريه اللي دار بي
......................................
يا نخل طال وطرح فوق
و لا كانش طولك بلا احنا
أنا والفقاره على شوق
ندوقوا مرة بلحنا
....................................
يا وطن سكنا منافيه
وحملنا ع الكتف ليله
إمتى ننول المنى فيه
ونهارنا يظهر دليله ؟
..................................
صنتك في مرة وسبعين
و لامرة ودي تصوني
وأنا في عشقك أسيب عين
و لا ندل يكسر حصوني
.....................................
كتبت إسمي على البحر
يمكن بغيري يسافر
ويعيش حياته بلا قهر
ويلاقي وافي المشاعر
...................................
يا أرض حملت نبين
ومن النعايم ترى بها
وعرب وقبط ونوبيين
أكلوا مغارس ترابها
...........................................
البدر بدري مبدريش
بدري طلوعه ولا لا
بدري طلوعه ما بدريش
أنا تهت ساعة ما لالا
.................................
أحضن ترابك ونخلك
وأبوس بيبانك وعتبك
واعمل قليبي مناخ لك
وبتسهي عني وما اعاتبك
.......................................
كام خضت لاجلك موانع
ورهنت لاجلك نهاري
وزرعت رملك مصانع
وأديني جايع وعاري
...................................
بيت السبوعة بلا عضام
وكلاب ع اللحم نامت
الحر يصبر لو انضام
ولا ينحنيشي لشامت
....................................
القرش دايس على الناس
وف إيده كل المبادي
لو سبت صبرك عليه داس
عمره انفلاته ما بادي
...................................
لبست عري المجانين
ومشيت ف الطرق أهاتي
مروا اللي مروا ما سائلين
ورجعت شايل آهاتي
.....................................
ما دام عيونك في راسك
والأرض باينة سماها
إنت اللي تعرف خلاصك
وترسم لروحك سماها
.....................................
سبنا جروحنا ورحنا
نخطب وداد الأعادي
والله إن ما فقنا لروحنا
لتاكل لحومنا الحدادي
.......................................
أبو عقل أجوف كما الطبل
ما يحقق اللي يسره
واللي ف رقبته ربط حبل
تاجي الخلايق تجره
.................................
مع السلامة يا أندال
حكسر وراكم جراري
وحلفت ع الشر إن زال
ل أقفل على النفس داري
.......................................
لا تماشي خاين ولا ضال
ولا ترضى بالندل ساعة
مشي الخسيس يا ابو الخال
يكسيك بلون البشاعة
.......................................
الكدب ما لهش رجلين
ونهايته خيبه وندامه
والصدق راجله براجلين
ولسانه ما لهش زله
.......................................
كم ليك في الصدق منجاه
يوم المحاشر يفيدك
وتحس طعمه كمنجاه
بصل القناعة اللي ف ايدك
..................................[/
موضوع: من فن الواو ( فن صعيد مصر ) ........ للشاعر عبده حسن الشنهوري 
الثلاثاء مايو 10, 2011 7:30 am