الخيول
..................
تلاتين سنه وحسِّنا فى الشرع كـــــان عَـــــوْره
كامشين في بطن السكوت لا خروج ولا مناوره
إلا وصوت انطلق هــردم حيطان الخـــــوف
مالها ياخال البلد؟!..قالــولي دي الثــــوره!!
ـــــــ
أولاد كـــزهر الربيع صـــحّونــا م النــــومـــه
داسوا جدور العطن قام الوطن قــــــومــــه
ثوره جـــرَت في الــدروب كما حِس ندّاهه
خرمت ودان البلــد ولاهمــــها حكومــــه!!
ــــــ
تلاتين سنة والبلد حرمانـــــه على ناسهـــا
ترقد في باط الغريب وتخـــون حُــرّاسهـــا
رغم انه سرق الحلق والطرحة والرغفــــان
شفتوشي جاريه يا نـــاس بتحـب نخّــاسها!!
ـــــ
ندّابه خرسا وليل اسـود وشعــب ضــريـــر
فارطين قلوع الخلاص راضيين بأي مصير
ضاقت علينا السكك رغــم اتساع الكـــون
وفجأه جابوا الـــولاد الفجر م التحريـــــر!!
ــــــ
آدى الفساد انكشف والمستخبي اهو بان
بقي عيني عينك ع الشاشه وف الجورنان
في الضُهر لحم البلد بيــفرّقوه على بعــــض
جالِك أوان الهـــدد ياعشّـــة الـغربـــــــــــان!!
ـــــــ
لابد تاخدوا الجِزا من جـــنس أعمـــالكــم
لا الأرض دي أرضكم والمال مهوش مــالكم
آدى جياع البلد واقفين كــــحــد الـفـــــاس
قادوا الحطب بالغضب ورجعتوا بجمالكم!!
ـــــــ
وبنيت لي بيت في الميدان وفتحت شباكي
صَبَح الميدان عزوتي وافراحي وعُـــراكي!!
واجمل شباب البلد طلعوا يدوسوا الظلم
ولا خدنا خمسين دولار ولا دُقـنا كنتــاكي
ــــــ
وان سِبْــنا جدر الفساد يسرح ويطرح غول
والندل لو يوم قتل فالحق ع المقتــــــول!!
غالى ياتمن الكلام جوا بــــــلاد الخُرْس
تحِيي الرميم م التراب وتحــرّك المشلول
ـــــ
كل المدن والقرى طلعت بشكل رهــــيب
حالفين يزيحوا الضلام ويحشّوا راس الديب
والديب عجوز من زمان خلَّف ولاد يامـــــا
متّاوي جوا القصب دايماً وقتــــــله صعيب
ــــــ
تلاتين سنــة تلهفوا واحـــنا اللي إتهــــــنّا
كـان اللومان عِشّنا في ليل الشتـــا وكُــــنّا
ممنوع علينا الكلام ..حتى الصلا والصوم
ضيّعتوا ديــــن ربنــــــا والفـــــــرض والسُنّه
ــــــ
الشعب كرهك خلاص كُرْه الشجر للفاس
وانت اللي بارد قوي لاشعور ولا إحساس
كفياك بجـــاحه ولملم خِسّتك وامـــــــــشي
من خَد غضب ربنا طب كيف تحبه الناس!!
ـــــــ
واشمعنى يعنى النهاردة بقينـــــــا أولادك
ولا كنا يوم عزوتــك ولا زادنــــا من زادك
ياما اتنبح حِسِّنا واحــنا نقول لك حـــوش
ولا يوم سمعت الندا وفضلت ف عنــــادك
ــــــــ
تعند ما تعند ماحااقبــل سلطتـــك تـــــــاني
دا انا لسه شهقة أخويا ف ودني خـــوتاني
لما اترمى فى الميدان وصرخ وقال يا مصر
من يومها حالف ماديب يفضل في أوطاني
ــــــــ
إرحل يا أُس الفساد..غور انت ونظامـــك
ملّينا من منظرك وكــــــرهنـــــا أيــــــامـــك
كفايانا هم وجـفا وتوهه مالــيها حــــــدود
آن الأوان ياهُبَل ترحـــل بأصــنامــــــــك!!
ـــــــ
الطير لايمكن يطير لو سابته جناحاتـــــه
والغصن كيف ينتشي لو دبلوا ورداتـــــه
وانت اللى ماسك في قَب الناس ومدقّر
دا الشعب لو يوم غِضب ماتفض ثوراتــــه
ـــــــ
آدى الشبــاب الجميل إتلَم في ميدانـــــه
مجروح بسيف الوطن غرقان في أحزانـــــه
ماشى يُـدُك الضلام عشمان في حِــــتّة ضي
مستنّي يلمح طــــلوع الفــــجر وأدانـــــــــه
ــــــ
كدّاب ياضي النهار لوكان في عِبّك ليـل
ويا جُبن لا تنتصر لو حتى راكـــب خيــــــل
كل العيـــدان تنحني لما تهّب الريـــــــــح
والنخل عالي الجبين واقف مايعرف ميـل
ــــــ
الليل قِــهِـر م النهار وجراءتـه وكـــلامــــه
إللي دبَــح عتمتــه وكسَــرلُـــه أوهــــامــــه
وزَّع جيوش الضلام على كل بقـــعة نــور
ونسي ان لون النهار لــه برضه أحكامــه!!
ـــــ
الشعب جوا الميدان يشبه لخيل جامح
قابضين على الحلم إللي في قلبهم رامح
الشمس طلعت عليـــهم دفّت الإصـــــــرار
والصبح بربَش وصار له عيون وملامـــــح
ـــــــ
معروف في كل الملل عمر الفساد ما يدوم
والظلم مهما انتشر له برضه يوم محـــــتوم
بس انتوا يا أغــبيا خــــدعتكوا أوهامــــكم
وبلعتوا كل الثـــمر من شجــــرة الزقـــــوم
ــــــــ
طولان يايــوم الشقا عرق الغلابـــــه يـــــنّــز
والهم منشار لعين في قلوبنـــا عمــا يجّـــــز
نحسِب ونقلِب في هـــم الهــدمه واللقمـــه
وبلدنا خيرها كتير لكنــه لأحمــد عـــــز!!
ـــــــ
يابهيـــه منّك أنــا وســمـــاري من طينــــــك
ولا طُلْت حتى البصل والهِــــلف كَل تينــك
أنا اللي من قوت عيالي اشتريتـــلك شــــــال
أدهم أنا في المحـــــبة وف الهوى ياسينــك
ـــــــ
إحنا الرجال في الميدان والنخل ف نجوعِك
واحنا الأيادي اللي تمسح فى البلا دموعِك
لا سرقنــــا يوم ميّتِك ولا بعــــنا يوم غـــــــازِك
زي الديابه اللي لحم كتافها من جـــــوعِك!!
ـــــــ
وانت ياراس البلد ياوحش ســــاكن قصــــر
ضحكوا علينا الهمَــــج وقالولنا جــــاب النصر
ملّــــينا من قــصــــة اول ضـــــربـــــه جــــــوّيّه
معقول حليف إسرائيل ممكن يخاف على مصر؟!
ــــــــ
مين اللى خان الوطن مين للرعــاع باعـــــه؟!
ووزَّعــــــــه في العــــــلَن لاهــــلـــــــه وأتـباعــــه
وانا اللي م الفجر صاحي عشان طابور العيش
محزون لبيع الــــوطن للغُرْب وضيــــاعــــــــه!!
ــــــــ
ياللي هجرتوا الوطـــــن وسرقتوا ملايـــــــينُه
من بعد عشق الوطن دلوقتي كارهيــــــــــــنُه
مصّيتوا دم الفقير ولحــستوا أحلامــــــــــــــــــه
آن الاوان للـــــــوطن يطــرد تــــــــــعابـــيــــنُه
ــــــ
صار الميدان البطل ولافيه بطل غيــــــــره
رويناه بنور دمنا فعطانا من خيـــــــــــــــــره
لو غبنا عنه نلاقيه مستنّى في المواعيـــــد
واقف كبرج الحمام يــنده على طيـــــــــرُه!!
موضوع: حصريا ( قصيدة الخيول ) ....من روائع الشاعر : عادل صابر 
السبت يوليو 23, 2011 6:07 pm